يا ايها الفن المستقل، النضافة حلوة

صورة من جوجل ايميج منعرفش بتاعت مين بس بتعبر عن مضمون الكلام اللي تحت دة

ناس كتير إنجذبت للفن المستقل الفترة اللي فاتت ( مزيكا و سينما و جرافيتي و غيره ) بقى ليه جمهور بيلف وراه و يتابعه .. ولو ع الأسباب فلأسباب كتير منها ان في ناس لقت اللي يعبر عنها وفي ناس لقت اللي يطربها و في ناس لقت اللي يخليها مميزة وسط المحيط الخاص بيها وفي ناس المجال دة سبوبة ليها وفي ناس استخدمت علاقتها في إنه يكون سبب شهرتها .. أخش في الموضوع ضغري و مطولش عليكم كلامي عن ناس كتير جوا المجال دة و يمكن أغلبهم كمان الناس دي مبيفرقوش عن اصحاب الفن التاني الوحش اللي هما المفروض واقفين بيحاربوا علشان يظهروا الفن المستقل اللي فيه احترام للجمهور بس بصراحة انا مش شايف فرق بين اللي واقف هنا و اللي واقف هناك لان الشخص اللي مع اللي بيجيب فلوس و بيلعب على رغبات الجمهور علشان الفلوس و الشهره هو هو مهما إتغير توصيفة الوظيفي و مهما اختلف الصف اللي واقف فيه .. يعني زي ما السبكي بيعمل فيلم عن البلطجة و كام بنت ترقص و تعري السمانة علشان يبيع تذاكر زي ما في فرق موسيقية و فنانين رسم و صانعي افلام بيتمحكوا في رغبات جمهورهم و رغبات الجهات الممولة و رغبات المعلنين بمعنى أصح رغبات الناس اللي يقدروا يأكلوهم عيش ولأن قليل عدد فشخ من الفنانين بمختلف مجالتهم هو اللي كان رافع رايته قبل ما الفن المستقل يسمع - بسم الله ما شاء الله تكاثروا دلوقتي - ف عدد اللي لسة محافظ علي نفسه و إستقلاليه فنه و تعبيره عن نفسه و مش بيبص للفلوس على قد ما بيبص للفن اللي المفروض إنه بيقدمه بقى أقل بكتير.

و نخش ع الوسط الفني و يا عيني ع الوسط الفني اللي هو المفروض إنه يكون الوسط الراقى اللي بيتواصل فيه كل الفنانين ذوي المشاعر و الإبداع و البلابلابلابلا بس الحقيقة عكس كدة خالص بقى جداً .. وسط قذر لدرجة لا تكفي كلمة قذارة عن وصفها و مش بتكلم عن الفن المستقل و بعيب فيه لوحده لا انا بتكلم عن الوسط الفنى شاملاً الفن المستقل او اللي كان مستقل،، الوسط الملعون دة قادر و بمنتهى الحرافية إنه يحول أي موهبة الي حرفة و يحول أي أحساس الى خطه ربح، أنا مش ضد أن حد يكسب من موهبته بس لو هو اساساً فنان ف موهبته هي اللي حتخليه يكسب مش الت*ريص و قعدة الفنانين هما اللي حيظهروا موهبته، كام مخرج أتعرف عن طريق اليوتيوب و كام فنان جرافيتي الناس حبته لما شافوا صور رسمه على الفيسبوك و كام مغنى اتعرف بتراك على الساوند كلاود دول لا إحتاجوا تمويل ولا راعي دول بفلوسهم و بتكلفة منعدمة وصلوا فنهم للناس،،ـ الفنان او الموهوب بمعنى أصح طول ما هو برا شلل الوسط الفني او ع الاقل في تماس بسيط معاها ف هو بخير و فنه صابح مش متحدد.

الفكرة من اللي بقوله هو ان اللي على راسهم بطحه يحسسوا عليها وكفاية بقى الشعارات والتماحيك و الكلام اللي ملهوش معنى غير في إستمارات البحث عن تمويل، عايز تكسب و عايز تتشهر و عايز تفتح مؤسسة البلالالم لتنمية البلاليكا و عايز تجمع فلوس علشان اي حاجة ليك.. اعمل كل اللي في نفسك بس ياسطا و حيات الزمن اللي مبيصعبش عليه حد يوم ما حتتفضح و يظهر عكس كلامك محدش حيسمي عليك :D - معاً لتطوير أسلاك النت و دعم العدالة المهلبية في شمال شرق بولاق الدكرور - .. المجال دة مبيعملش فلوس ف بصوا براه و سيبوه للي بيبصوا لنفسهم قبل جيوبهم و بيفكروا بعقلهم مش باللي بين رجليهم ولا مؤاخذة.

طب بدروم ما بدروم اسمه منصة دعم الفنون المستقلة ؟? .. بدروم بيدعم الموهوبين و بينشر الفن في المجمل و بالتركيز ع الفن العربي المستقل و بدروم لا عمره دخل ولا حيدخل في اللعبة الوس*ة دي و حتي زمان لما حاولنا ندور على فلوس ف فكل مرة كنا بنصارح الجمهور و بنعلن عند التقديم اننا قدمنا للمشروع مش لينا و الحمد لله فشلنا و محاولتنا وقفت لما الصورة بانت و نظرنا للأساليب الوس*ة بقى واضح و كلامي ده مش جديد دة صارحنا بيه الجمهور على صفحتنا قدام اكتر من 75 الف بني ادم و الناس باركتنا على نجاحنا في اننا و للسنة التانية منصة للجمهور قبل الفنانين و مستقلين و حنفضل مستقلين :P

تقرير