ازاي تنشر موهبتك وسط الناس بأستخدام السوشيل ميديا
- حينحصر كلامي عن المغنين و الباندات بس لو انت موهوب في اي حاجة فنية غير دة ف برضوا المقالة حتفتحلك طرق للدعاية عن مواهبك -
لو مغني او انت باند او حتى ايفنت بلانر لما تكون بتعمل حفله لازم تبقى عارف ازاي انت هتوصل الايفنت بتاعك للناس و ساعاتها تقدر تبقى خارج من الحفلة عارف انت مكمل طريقك ولا محدش في البلد دي حيسمعك و حتى لو محدش حيسمعك ف غني لنفسك و بما ان الفن في البلد دي بقى اغلبة بزنس ف شوف انت حابب تعمل اية، المهم اللي حتكلم فيه تقريباً محدش كتب عنه حاجة و هو ازاي تعمل دعاية لنفسك و لحفلتك و كلامي حيكون تحديداً عن دة داخل مصربصفتي عايش هنا، المهم يا سيدي كلامي اللي جي حيبقى متقسم لحاجتين ( الدعاية للفنان + الدعاية للايفنت ) اول حاجة، انت كـ( شخص/باند) قبل ما تفكر تعمل حفلة لازم يبقى عند القاعدة اللي حتقدر على اساسها تدعى الناس " الجمهور" بمعنى اصح لانهم ينزلوا من بيوتهم أو يقوموا من علي القهاوي أو يسبوا شغلهم و يجولك و القاعدة دي بما انك مزيكاتي فقاعدتك هي المزيكا و الأغاني و الأشعار، و في مصر المواقع المعروفة هي الساوند كلاود و اليوتيوب و الشير بيكون من فيسبوك او تويتر و نادراً جوجل بلس و بالنسبة لمغني غلبان او باند معهوش تمويل ف الحاجات دي و ادارتها بتمشي بالحب ف الغالب و هنا بداية كلامي.
الدعاية للمغني او للباند " الغلابة او الجداد "
ساعات في مغنيين او باندات بيقولوا ان فنهم بس هو الدعاية بتاعتهم و انه مجرد ما ينزل تراك ليه علي الساوند كلاود دة كافيل بانه يعمله دعاية و دة شئ مش صحيح اطلاقاً الا بالصدف ولان النجاح اللي بيجي بالصدفة بيتلاشى صدفة فلازم النجاح دة يجي بخطوات و مجهود ، مش شرط يبقى عندك ويب سايت في بدياتك بس حيبقى شرط لما جمهورك يكسر حاجة ال 10 الاف شخص لان 10 الاف شخص حيكون موقعك بالنسبة ليهم ارشيف ليك يعني صورك و فيديوهاتك و سيرتك الذاتية و تراكاتك و مواعيد حفلاتك و الاخبار اللي بتتنشر عنك و الخ الخ .
الفيسبوك و تويتر و جوجل بلس : لازم يكون عندك صفحة علي كل شبكة من تلات شبكات التواصل دول " صفحة مش اكونت شخصي " ولازم تهتم بصورة البروفايل و الكوفر لان دي وجهتك و تبقى محافظ علي معدل نشر يومي ثابت يعني مثلا شير 3 صور و 3 تراكات و فيديو و مش شرط تشير ليك ممكن تشير للناس اللي هي قدوة بالنسبالك و تعرف جمهورك قد اية الناس دي قريبة من قلبك، كلام اهبل ؟ لا مش كلام اهبل دة بحدد جمهورك حتي لو مكنش حتى حد ليهم سمعلك تراك بس هو حيبقى عارف انك باند او شخص عنده زوق و خلفيه عن اللي بيقدمة مش بيقدم و خلاص بس ميبقاش كل محتوي صفحاتك ناس غير لازم يبقى ليك نسبة اكتر من 50% من اللي بتنشره عندك و بتكلفة 200 جنية مصري ممكن تعمل لنفسك حملة دعاية علي الفيسبوك و باستخدام شوية هاشتاجات تقدر تحقق متابعه ليك علي تويتر و اللي من خلالة ممكن تقعد تهري في اي حاجة بس لازم الناس تشوفك بتتكلم و تفهم دماغك لان جمهورك لازم يعجب بدماغك قبل صوتك لانه لو غير كدة فانت مجرد بلونة و حتفضى و تختفي مع الوقت امال الانستجرام يا برنس ف دة لزمته ان الناس تشوف وشك و تفضل فكراك تهز تنشر صورك السيلفي تتصور و انت مش واخد بالك المهم خلي الناس شيفاك.
ساوند كلاود و يوتيوب : لما تيجي ترفع تراك علي الساوند حاول تعمل شرح كويس للتراك و تضيف الكلمات في الديسكربشن و تخلي اسم التراك بالعربي او الانجليزي المهم متكتبش فرانكوا خااااااالص + لازم تعمل ارت روك كويس " الصورة اللي بتبقي في خلفية التراك " + لازم تحدد نوع التراك و البلد في التاجز اللي بتكون تحت التراك علشان دة بيمكن الساوند بانه ينشر تراكاك في الكولكشين اللي عاملها عنده و دي دعاية ليك في حد نفسها، اما اليوتيوب ف حاول تكون احترافي في اللي بتنشره علي قد ما تقدر و تضيف بياناتك في الشرح و لينكات التواصل معاك و مش لازم رقم تلفونك محدش حيطلبك في حفلة من اول تراك ولا اتنين يعني بلاش غباوة + ممكن تعمل فيديو كليب تصور فيه نفسك و اصحابك بشكل اخراجي بسيط و الصوت بتاعة يكون تراك ليك بس خلاص كدة الكليب اتعمل و الناس حتشوفه و كل واحد طلع في الكليب حيعمل شير لية و حيتشاف.
ولو عايز تعرف اكتر عن ازاي تظبط السوشيل ميديا بتاعتك بشكل احترافي جداً الينك دة حيكون مفيد ليك بشكل مش ممكن تتخيله
دة عن ازاي تدير السوشيل ميديا بتاعتك
ودة عن ازاي تعمل ديزاين حلو لنفسك من غير مساعده
حبة ملاحيظ
محيطك الشخصي هو اللي حيساعدك بشكل اساسي في انك تكبر دايرة جمهورك يعني اصحابك يعملولك شيرهنا و ريتويت هناك و لايك هنا و جونج هناك و كدة يعني لحد ما تبدء الناس تاخد بالها منها في الوقت دة متبقاش غتيت علي قد ما تكون لطيف يعني متخليش كلامك مع اصحابك عن فنك لا كون طبيعي بس جزء الفن دة اطلب دعمهم ليك فيه بالحب مش بالغتاته + انت مش قليل مهما كنت مش معروف ف متحاولش تزل نفسك لحد علشان ينشرلك شغل السبكي دة ملهوش مكان على السوشيل ميديا - الحاجة التانية اللي تعتبر مشكله بتواجه معظم الفنانين المبتدئين او الباندات ان معندهمش كلمات جديدة وعلشان كدة كل فين و فين ما يعملوا تراك مبدئياً مش شرط تكون مؤلف علشان تبقى مغني ياسيدي عندك تاريخ كبييييير جداً من الاغاني اختار منهم و غني و اظهر صوتك و ساعتها حتلاقي الشعرا و المؤلفين اللي يسمحولك و يعرضوا عليك كمان تغني حاجات ليهم ف متعطلش روحك ع الفاضي المهم يعني خلي صوتك شغال و اتاكد انه حيتسمع -.
الدعاية للإيفنت
اكتر حاجة بتكون مرعبة لفنان جديد هي اول حفلة لانة مش بيكون ضامن انه حيأدي كويس او ان في حد حيحضر من الاساس بس بص يا سيدي الدعاية للايفنت ببساطة هي انك بتستخدم كل الوسائل اللي ذكرتها فوق دي بان تعرف الناس بحفلتك و تدرش مع الجمهور بخصوص انهم يحضرولك و اية اللي يحبوا يسمعوا،، الخ و في شوية وسائل تانية مفيدة جداً و حتكبر دايرة اللي ممكن يحضرولك و هي انك تراسل ( في البلد + مواعيد + بدروم + البوابة نيوز ) دول بيساعدوا المواهب و الفنانين الغير مشهورين و حيتفاعلوا معاك و حيساعدوك في نشر حفلتك و في الحفلة حتواجة نتيجة تعبك دة كله بالنجاح ان شاء الله :))
نمي موهبتك، فكر صح، خطط، حارب، تنجح :)
و بس يا سيدي بالتوفيق
0 التعليقات